焗攻VS喪攻 曼城皇馬大駁火

猪拉多纳

曼城正值生死存亡之秋，贏唔到即出局；皇馬唔理主場作客都攻到你慌，此如格局，又豈有不「大」之理！歐聯「死亡D組」重量級大戰，曼城主場鬥皇馬，主隊正處出局邊緣必喪攻，弗爆泰維斯、阿古路有力破門；皇馬近期打起埋賓施馬，1.52倍大盤筍爆！

（有線61及201台周四凌晨3時45分直播）
曼城唔贏即畢業

此組發展估佢唔到，目前多蒙特以8分高踞榜首，皇馬少1分排第二，而阿積士有4分，曼城則僅得2分包尾。曼城教頭文仙尼，於上仗逼和阿積士後扯白旗，話球隊本屆歐聯夢已完，但實際上曼城仲未死得晒，數字上仍有出線機會，加上如果又輸畀皇馬，勢必增加文帥被炒壓力，故曼城肯定落力爭勝。「阿根廷孖寶」阿古路、泰維斯上仗英超均梅開二度，今場要轟破卡斯拿斯十指關唔難。
皇馬唔攻唔安樂

皇馬大打攻擊足球，「天王」C朗場場搏盡永無欺場，其高昂鬥志，為「銀河艦隊」注入無窮動力，難怪球隊入波源源不絕。睇番今屆歐聯賽事，皇馬4戰全數開大，同對手合力炮製17個入波；而大軍近7仗，總入球都超過3球。現時皇馬出線仲未穩陣，就算作客曼城都照攻可也，加上法國中鋒賓施馬翻生，上仗省2粒，今戰冇理由唔吼大。