斑馬跑贏跣胎車

猪拉多纳

佛帥亂晒龍打費托入冷宮

歐聯分組賽E組大戰爆發，祖雲達斯今晚喺主場對車路士，主W值得吼實。雖然車仔係上屆冠軍，又喺聯賽專登留力，但佢哋踏入11月後嚴重跣胎，據講「佛帥」迪馬堤奧發火打算將費蘭度托利斯打入冷宮，亂晒龍捧唔過！

（有線61及201、中央5台周三凌晨3:45直播）
留力負西布朗迪馬堤奧喪鬧

現時車仔同薩克達同得7分，只以1分騎住祖記，形勢上今場要搶分保住出線主導權，所以日前喺聯賽作客西布朗，3個正選中場桑馬達、奧斯卡杜斯山度士同拉美利斯只係後備上陣，結果車仔以1:2慘敗，搞到教頭迪馬堤奧失控，閂埋更衣室大門鬧球員唔配做歐聯冠軍。
祖記走勢好17戰11勝

要知道「佛帥」出名喜怒不形於色，最近佢四圍鬧人，家陣連球員都照噴，證明壓力爆煲。消息仲話，迪馬堤奧已經亂晒方寸，決定棄用有老細阿布撐腰嘅隱形射手費托，又親口承認話想簽馬德里體育會嘅「老虎」法卡奧，加上隊長泰利又有傷在身，車仔相當頭痕。

事實上，過去幾年冬季表現勁曳嘅車仔，踏入11月後得1勝2和2負全面跌Watt，最近主場被利物浦逼和，跟手再輸畀西布朗明顯跣胎。對家祖記有中場靈魂派路喺聯賽坐波監後，今場可以搏殺，即使射手胡仙歷未好番晒，依照「斑馬兵團」開季17場有11勝5和1負嘅走勢，始終抵撐。
車仔穩陣波捧入球細

雖然睇好祖雲達斯贏波，但車路士似乎唔會大敗，因為經過近期不斷跣胎，車仔領隊迪馬堤奧話會調整打法，寧願冇波入都要先求不失。即係點？上季車仔玩謝巴塞隆拿同拜仁慕尼黑嘅死守打法呀！再講，近排夏薩特嘅威力已經冇季初咁強，既然迪馬堤奧唔願攻，就算祖記近5場有4場開入球大，都係扒逆水玩入球細！
祖記近戰半場多不失

‧祖雲達斯喺歐聯分組賽至決賽歷來攻入197球。

‧祖記今屆分組賽埋門40次不中框為各隊中最多。

‧斑馬兵團近8場有7次半場不失。

‧車路士連續9場有失波。

‧車仔近12場有10次開入球大。

歐聯E組