斯巴達大晒冷同巴塞鍊過

猪拉多纳

今晚歐聯頭場之一，G組嘅巴塞隆拿上仗大意失荊州輸畀些路迪，今仗作客莫斯科斯巴達必力爭贏波提早出線，但佢哋防線漏洞唔少，面對非勝不可、豁出去搶攻嘅斯巴達，雙方勢必毫無保留大駁火，大盤有買趁早。

（有線61及201台周三凌晨1時直播）

今季由維蘭路華掌舵嘅巴塞更具侵略性，換來美斯持續爆發。不過睇番「地上最強」開季19場正式賽事中，只有5場保住清白之身，特別係面對快速反擊同高空波防守方面，更為人詬病，雖然兩大中堅佩奧爾同碧基已傷愈，但狀態不足，短期內防守質素難望改善。

另一邊廂，莫斯科斯巴達若贏唔到就無緣晉級，定必豁出去進攻，該隊今屆四場歐聯有三次開大，前線羅姆路、艾曼紐艾文歷基等反擊銳利，絕對有本錢同巴塞鬥攻。
賓菲加咬唔入些路迪

同組另一場由賓菲加主場硬撼些路迪，儘管主隊技高一籌，但些路迪上仗爆冷擊敗巴塞，全隊士氣高昂，作客有力全身而退，「讓球客勝」值博。

（有線63及203台周三凌晨3時45分直播）
Ｇ組出線形勢

其實四隊都有出線機會，當中以巴塞最為樂觀，只要在餘下兩仗贏一場，便獲得出線權。些路迪如果今輪戰勝賓菲加，就肯定出線。相反若賓菲加擊敗些路迪，便以較佳對賽成績壓倒同分嘅些軍，只要喺尾場贏巴塞即可晉級。包尾嘅莫斯科斯巴達情況最危殆，除了要做好本分贏晒最後兩輪外，仲要望賓菲加今輪先擊敗些路迪，又喺尾輪贏唔到巴塞，機會渺茫。