車仔有買趁「祖」

猪拉多纳

生死戰經驗秤先

歐聯E組意甲豪門祖雲達斯主場惡戰英超勁旅車路士，車仔貴為上屆冠軍，老細阿布拉莫域實在接受唔到分組賽出局之辱，呢點領隊迪馬堤奧同班球星都心知肚明，各人為保飯碗，將會團結一致踢好今場關鍵「六分波」，雖然盤口唔夠硬淨，但堅信車仔頂得住，受讓半一要下盤！

（有線61及201台周三凌晨3時45分直播）

車路士上屆稱霸歐聯，班兵於晉級過程踢出打甩門牙帶血吞態度，一再於下風波輸形勢贏波，呢種血性足球充滿激情，贏得唔少球迷讚頌。車仔今季重用夏薩特同桑馬達等技術型球員，好睇就好睇喇，但踢落唔多硬淨，之前兩戰薩克達全面暴露呢個弱點，今場許和不許敗，正如教頭迪馬堤奧所講，一定要先穩住後防，唔好再出現無謂失波打擊士氣。
薩克達「大」擦魚腩

盛傳施治上場聯賽輸畀西布朗後爆粗鬧隊友，令隊內氣氛緊張，令迪馬堤奧要召開緊急大會穩定軍心。有冇唔妥都好，都冇理由搞寸老細Party，如今大敵當前，心病都要暫時擺埋一邊。論大戰經驗同人腳，車仔都在祖記之上，受讓半一必撐下盤。

仲有一單料，就係持續一個月的問題球證卡頓保案即將塵埃落定，據《每日星報》透露，英足總確認卡頓保種族歧視約翰米基爾不成立，將不會處罰他；相反車路士因誣告英超球證，聲譽將毀於一旦。37歲的卡頓保堅決否認種族歧視約翰米基爾，但因配合警方和足總調查而連續三周無緣執法英超賽事。如果他認為車路士毀掉其名聲，可能反過來提出起訴。

同組丹麥魚腩洛斯查蘭特主場對烏克蘭勁旅薩克達，洛斯查蘭特分組賽四戰一和三負狂失十一粒，完全唔夠班，之前主場賽和祖雲達斯踢出代表作，但可一不可再。薩克達具備條件成為歐洲一線球隊，砌弱旅絕冇手軟，有力大勝，捧大盤！
和波都有着數

E組成三強鼎立之局，車路士及薩克達目前各得7分並列榜首，兩軍若於今場贏波，即可攜手提前出線。車路士如果於今仗賽和得6分嘅祖雲達斯，出線形勢樂觀，只要在最後一輪在主場擊敗洛斯查蘭特就可晉級，至於祖雲達斯同薩克達會於最後一輪上演生死對決。