韋斯咸扑爆史篤城

猪拉多纳

「大Sam」改革成功踢法實際

夠實際，冇閉翳！由「大Sam」艾拿戴斯改造嘅韋斯咸，近兩季雖踢出不一樣嘅韋斯咸風格，但夠實際嘅踢法，就成功將隊波由英冠帶番上英超，更甚係殺上前列，有望挑戰歐洲賽席位添！今晚「大Sam」呢支攞命「錘仔」會喺主場迎戰作客例牌走樣嘅史篤城，要扑爆對手開1.9倍主W又有幾難吖！

（有線200及300、廣東體育周二凌晨4:00直播）

曾經出產包括林柏特、祖高爾等英格蘭國腳嘅韋斯咸，一向以細膩組織踢法喺英倫球壇稱著。不過自從「大Sam」喺舊年暑假接手球隊之後，就曾經畀人寸佢哋淨係識將個波踢前，只係我行我素嘅「大Sam」一於少理，堅持呢種佢認為係最有效率方法，仲話即使大球會都唔會係場場好睇，結果「錘仔幫」喺佢領導下，上季就成功取得英冠第一得以重返英超，未計今輪之前，排喺英超第7位，絕對令人喜出望外。
史篤城作客腳軟15場不勝

經「大Sam」呢兩年買入或借用嘅球員諸如中場路蘭、前鋒安祖卡路爾同門將積亞基連倫等，依家都喺球隊發揮巨大作用。路蘭至今入咗5球唔嘢小，安祖卡路爾嘅柱躉二傳能夠徹底破壞對手防線，至於37歲嘅高齡門神積亞基連倫左飛右撲未見老態，更係球隊賴以成功嘅基石。雖然今仗有兩名攻擊重心班拿約及馬菲查維斯上陣成疑，好彩鐵衞馬菲泰萊經已復操，大大提高後防穩定性。

另邊廂嘅史篤城，上季都以傳統英式踢法威過吓，可惜今季冇乜料到。力奇搵過資料，佢哋近15場英超作客波都未贏過，仲要只入8球，真係點信得過吖。仲有，佢哋今季平均只得40.8%控球率，係全英超最低，連掂波機會都唔多仲點贏呀？更何況佢哋個中場茅王韋赫特今晚停賽，防線前面少咗道屏障，想喺烏普頓公園球場作惡？發夢咪咁早啦！