國米搵里省番靚個招牌

猪拉多纳

意甲爭標球隊國際米蘭，本周將主場對卡利亞里。上輪聯賽國米以2比3不敵阿特蘭大，但教練施特拉馬斯安尼冇責怪球員，因國米全場表現都好好，跌晒3分只不過係一時大意。經過沉痛教訓之後，國米今次一定會小心行事，加上喺聖西路球場比賽，國米更加唔可以令球迷失望，鬥志肯定百分百。預料國米可於主場大勝，「讓球主勝」可捧。（周日晚10時開賽）

國米有唔少傷兵，比如史奈達、捷禾、菲臘比古天奴及史坦高域等等，但因上述幾位球員經常受傷缺陣，球隊早就適應，相信影響唔會太大。況且大球隊兵源充足，有大把球員球可作替換，戰鬥力唔會突然下滑，反而球員心態對於勝負更加重要。

早前祖雲達斯喺積分榜一枝獨秀，國米球員都預咗自己冇機會爭標，點知一場「國家打吡」嘅勝利，令到國米於爭標路途重燃希望，今場誓必全力進攻攞3分，以向祖雲達斯繼續施壓。卡利亞里近兩場演出麻麻，而且近12年從未贏過國米，賽績輸蝕難信任。
「熱拿亞打吡」細盤穩

另外尾場為熱拿亞打吡，由森多利亞主場對熱拿亞。雙方每次交手都踢到飛沙劈石，攔截粗野兼吹罰多。比賽太多停頓定必窒礙兩隊爭取入球，細盤可以捧場。（周一凌晨3時45分開賽）