榜首「大」戰浦和惡鬥三箭

猪拉多纳

唔贏爭標隨時係咁先

日職已經鬥到入直路，第三位嘅浦和紅鑽今日主場對住帶頭嘅廣島三箭，絕對可以用「唔係你死，就係我亡」嚟形容，事關是但一隊輸波，後果可能就係同錦標講ByeBye，呢啲咁嘅肉搏戰唔博1.72倍入球大仲博乜？（now633、660及711台、有線148周六下午1:00直播）
槙野智章掉轉槍頭冇情講

大家只要攞個日職積分表瞄一瞄，就知今日呢兩隊都唔衰得。主隊浦和落後廣島9分，爭標機會微啲但未絕望，但係佢哋最大危機係後面跟住幾隊波，好似名古屋鯨魚同佢哋同分；清水心跳只係落後1分；橫濱水手、鳥棲砂岩就少2分，今日如果輸波，第三地位可能不保，話唔定連亞冠盃席位都冇埋。廣島嘅情況簡單啲，佢哋領先次席嘅仙台維加泰2分，唔想畀人追到，贏波係最佳辦法。

由於兩隊都唔輸得，雙方賽前都咬牙切齒話要開W，响廣島出身、由德國回流加盟浦和嘅後衞槙野智章，都開聲話冇情好講，一定要倒戈折「箭」。但廣島有本事佔據榜首，作客都唔會任人魚肉，入咗21球、高踞射手榜首位嘅佐藤壽人，門前反應敏捷，睇少眼都會畀佢搞掂，一心博全取3分嘅浦和，真係冇乜條件保證唔失波。

睇番浦和歷史上12次主場對廣島，雖然取得10勝1和1負嘅絕對優勢，但係有7場波開出入球大，而且佢哋近8場波只得1場保持得到清白之身，今場開個大真係唔奇亦唔難。