拜仁拆「紐」賀高美斯回歸

猪拉多纳

今晚德甲上演「巴伐利亞州打吡」，由德甲「一哥」拜仁慕尼黑出戰同州嘅紐倫堡！由於雙方實力懸殊，以拜仁嘅穩定走勢嚟講，今仗作客仍然係十拿九穩，「讓球客勝」就算得1.62倍，小妹都會捧到底！（有線61及中央5台周六晚10:30直播）

拜仁慕尼黑會長漢尼斯喺啱啱嘅年度大會上成功連任，一眾戰將今晚當然要生生性性，用勝仗賀一賀佢啦！查實呢支德甲班霸今季5場作客聯賽全部贏波之餘，更勁入15球兼保持不失，其中湯馬士梅拿個人就入咗5球咁多，數字僅次於「作客入球王」傑斯寧。

近期拜仁除咗宣布上季有1,110萬歐元純利，連續20年保持冇赤字，大營亦傳嚟好消息，就係喺暑期打柴嘅射手馬里奧高美斯終於傷愈，佢更喺周二嘅練習賽攻入4球，證明狀態一啲都唔曳，而且餓波咁耐，後備落場都肯定有貨派，文迪蘇傑真係要小心畀佢搶走正選位呀！
紐倫堡主場火力曳

紐倫堡早排對住榜下游嘅禾夫斯堡，先至打開今季主場勝利之門，而且佢哋喺自己地頭5戰先至入得3粒，火力同拜仁差天共地。曾經喺2007年率領紐倫堡擊敗拜仁嘅門將舒希化都心知唔夠打，惟有話：「如果可以把握到僅有嘅幾個機會，或者可以贏波嘅！」睇怕呢位門神今場都好唔得閒。