費Sir功力深唔怕傷兵多 金絲雀頂唔住後上「魔」王

猪拉多纳

近期「金絲雀」諾域治狀態相當唔錯，就連阿仙奴同熱刺作客嚟到都要敗走而回。不過今晚遇着力求贏波鞏固榜首位置，兼為歐聯壯行色嘅曼聯，就隨時成為費格遜嘅「籠中鳥」，1.98倍「讓客」值得捧場！ （有線200及300、廣東體育周日凌晨1:30直播）
曼聯負債減 格拉沙勁掠水

曼聯日前公布今年首季度財政報告，雖然負債大幅下降，但就被踢爆集資1.4億鎊（約17.2億港元）嘅班主格拉沙，有一半錢落咗自己袋，魔迷聽到肯定慶過辣雞。不過更令Fans擔心嘅係隊波今季傷兵停不了，後防尼曼查維迪同菲爾鍾斯長抖，莊尼伊雲斯傷吓踢吓，啲傷患好似病毒咁散播，拿尼同香川真司都受「感染」，近排仲蔓延到朗尼同尹佩斯添。

不過呢啲又點難到功力深厚嘅費Sir，今季8度落後下反勝獲封「後上王」外，就連喺曼聯跟操嘅施維斯達都話：「挑戰只會為費Sir帶嚟動力，乜嘢難題佢都會迎刃而解。」更何況費Sir有查維亞靴南迪斯呢粒「着火小豆」撐場！費Sir仲同對手打心理戰，話完全唔記得前曼聯青年軍、現為金絲雀主力嘅安東尼派京頓，暗寸佢未上過曼聯一隊唔夠班。今晚諾域治正選右閘羅素馬田繼續缺陣，老練嘅費Sir實朝住呢個缺口狂攻大炒對手啦！