沉倫打吡熱刺爆廠

猪拉多纳

後防穿窿阿仙奴入埋唔夠輸

今晚「北倫敦打吡」沉淪雙雄大鬥法！講緊嘅係阿仙奴主場對熱刺嘅大戰。雖然兩隊近排大跌Watt，但雙方以往交手都踢到飛沙劈石，睇怕今場戰況都會好激。雖然兩隊近況都麻麻哋，但阿仙奴條防線近期係咁失波，作客嘅熱刺今場可以大踢穩守突擊，配合快速反擊有望坐和望贏，1.9倍「讓球客勝」抵玩！（有線200及300、廣東體育周六晚8:45直播）
廠仔散晒4場勁失12球

本來阿仙奴季初極少失波，不過近期突然180度急轉，近4場竟狂失12球！失波畀曼聯同史浩克04都話啫，但對雷丁同富咸加埋都失8球，真係講唔通！今晚左閘基蘭基比斯繼續受傷缺陣，客串嘅華美倫狀態差勁好多甩漏，今場對住熱刺快翼艾朗連儂隨時慘被打爆！
熱刺高速三叉戟反擊勁

兵工廠唔知點解，主場表現往往唔及作客，今季英超同歐聯夾埋7次主場，只得3勝2和2負，得勝率連5成都唔夠。小弟聽聞酋長球場嘅球迷一向奄尖，主隊踢得唔好都無情講照柴台！阿仙奴依家個態咁沉，現場球迷又唔撐嘅話，主場出賽反而係個壓力添！

對手熱刺喺英超連輸2場，但上場輸畀曼城其實表現算係咁喇！射手迪科爾狀態大勇，佢同加里夫巴利、艾朗連儂組成嘅進攻三叉戟入波有保證，呢對高速組合玩反擊戰一流，加埋喺前場經常Hold到波助攻嘅艾迪巴約，阿仙奴識攻唔識守，好易又畀對手偷雞。

頂占筍盤：熱刺（讓球客勝）
熱刺英超作客全開大

熱刺今季英超作客比賽全部開大。

阿仙奴最近3場出戰歐聯前嘅英超賽事，全部以1球之差落敗。

熱刺今季聯賽連盃賽9場作客賽事，其中7場先開紀錄。
廠仔不設防博熱刺先入波

阿仙奴近4場都贏唔到波，追佢W嘅朋友真係喊得一句句，不過對熱衷於入球大嘅朋友就唔同講法喇，事關佢哋喺呢4場入得又失得，前面入13球咩，後面就失咗12球，加上兵工廠最近3次出戰歐聯前嘅聯賽全部輸波，熱刺就9場作客有7場係先開紀錄一隊，今場熱刺個2.28倍「第一隊入球」冇走雞喇啦！