QPR聖人榜尾大廝殺

猪拉多纳

近期「裸退」、「裸官」等等詞語頻頻出現，我咁緊貼潮流，都要話畀大家知：我絕對唔係「裸貼」心水推介畀大家、而自己又冇投Xo架！今晚英超上演一場關鍵榜尾大戰，由季前大事擴軍但仲未打開勝利之門嘅昆士柏流浪（QPR），主場迎戰升班球隊修咸頓，我首選捧大盤。（有線305台周六晚11時直播）

昆士柏流浪今夏買入好多大牌球員，好似車路士後防保辛華，曼聯中場朴智星，皇家馬德里中場格尼路及國際米蘭門將施薩索拉斯等等。呢班球員當中，雖然有啲已經過咗職業生涯高峰，但普遍都被認為仲有一定級數，可以幫QPR攞到一定成績。之但係球季已經過咗接近3分1，佢哋排喺榜尾之餘仲未開齋，實在令球迷戥佢哋心急埋一份。
QPR未開齋 修咸頓後防曳

修咸頓闊別英超幾年後，季初踢咗幾場好悅目嘅比賽，行軍速度快，不過有前無後嘅打法，好多時都搞到佢哋由贏變和、或者再衰啲由和變輸！後防就更加慘不忍睹，對住曼聯同曼城都喺領先情況下，去到比賽末段被對手反勝。上次主場出戰史雲斯，又喺大好形勢下，因為門將加沙寧加同後防吉田麻也犯下低級失誤畀對方扳平，咁又失咗兩分。睇番數據，修咸頓開季至今有超過七成比賽開出入球大，近六場聯賽亦有四場開大。喺兩隊後防唔穩陣、但前線有一定入球能力情況下，呢場波我揀入球大，同時亦可博QPR主勝。