瑞典老餅唔怕反 英格蘭用新丁仲煞食

猪拉多纳

每隔幾個月就會有一個周中國際賽日，除咗零星嘅世界盃外圍賽外，絕大部分都係意義唔大嘅熱身賽，同時間亦衍生出一大堆「逃兵」，多到數都數唔晒，今晚英格蘭作客瑞典，就有朗尼等5名主力退隊，但焗用新人隨時因禍得福，受讓平半抵玩。（中央5台周四凌晨3:30直播）
伊巴謙莫域再膺瑞足先生

面對無關痛癢嘅國際賽期，取勝關鍵並非有幾齊腳，而係落場球員爭勝決心有幾大，為咗唔影響國內球會備戰之後嘅重要賽事，英格蘭領隊鶴臣亦都面對現實，唔強行留住稱傷嘅星級球員，改為召入7名新人，包括利物浦翼鋒史達寧，以及成功轉籍嘅阿仙奴右閘贊堅臣，大大增強活力。還記得去年嘅11月16日，當時「三獅兵團」以老帶新，以1:0戰勝瑞典，同今仗情況極類似。

至於瑞典方面，啱啱8年來7奪瑞典足球先生，兼當選國內最佳前鋒嘅伊巴謙莫域，毫無疑問會擔正，但只可惜佢哋人腳變無可變，中場仲見到老將安達斯史雲遜，面對一眾「幼獅」嘅車輪戰，無疑落入下風。