本田擔大旗日本玩殘阿曼

猪拉多纳

世盃外圍賽亞洲區「10強賽」進入戲肉，阿曼今晚喺B組主場對日本，好難爆得出。雖然日本上個月喺熱身賽淨吞巴西4蛋，中場香川真司又因傷缺陣，不過做正大佬嘅本田圭佑話要打破國際賽入球荒，鬥心肯定無限，信得佢過就捧1.45倍客勝！（now671台周三晚7:30直播）
阿曼門將艾哈比斯有傷

雖然日本有曼聯中場香川真司同史浩克04右閘內田篤人因傷缺陣，但陣容依然係「超亞洲級」，其餘外流球員幾乎全部歸隊，當中最受注目當然係莫斯科中央陸軍中場本田圭佑。由於香川避戰，今場本田可以盡情享受做大佬權利，入波同助攻責任全部攬上身，爽呀！

現時日本以5分領先澳洲同阿曼，假如呢場贏波，就至少取得小組第3，可以踢第5圈附加賽，不過佢哋當然會力爭小組首兩名，以直接出線做目標啦，撞啱本田連續4場國際賽冇波入，賽前話明要入波洗脫慘負巴西嘅恥辱，對家阿曼有中場艾莫基尼停賽，後衞艾巴路殊養傷，加上効力韋根嘅隊長艾哈比斯未好番晒，好難頂得住本田同佢嘅「無回轉罰球」！

世盃外亞洲區B組