北愛鬥阿塞拜疆 揀半場和

猪拉多纳

世界盃外圍賽歐洲區都有比賽，F組北愛爾蘭主場對阿塞拜疆，兩支難兄難弟同樣未開齋，論人腳質素，北愛可以秤先些少，但佢哋一向擅守不擅攻，恐怕要花一番力氣先至咬得入「死守部隊」阿塞拜疆。由於主W同入球細都過熱並唔抵玩，建議不如揀2.02倍半場和。

（周四凌晨3時45分開賽）
面對弱旅唔識攻

北愛陣中唔少球員喺英超同英冠搵食，包括紐卡素中場沙恩費格遜、富咸雙雄拜阿迪及艾朗曉士等等。不過佢哋喺所屬球會都只係二流角色，連帶國家隊實力亦長年積弱，因此只能一直靠踢「擦鞋仔波」，面對強隊時唯一可以做嘅就係堅守防線，令對手無從入手；但係遇上弱隊時，要主攻佢哋就唔識踢。

北愛近兩場外圍賽先係主場同弱旅盧森堡打成1比1，之後作客對勁旅葡萄牙又係踢出呢個比數，兩場賽果盡顯呢班波嘅特性，所以今場對阿塞拜疆亦不宜高估。

阿塞拜疆自知斤両有限，場場都係採取死守博1分政策，尤其係上半場當有氣有力嗰陣，防守工作做得唔錯，三場外圍賽對以色列、葡萄牙及俄羅斯，都成功頂住半場0比0，今仗好可能又重施故技。以北愛防守型踢法，上半場更加難以攻破客軍大門，呢個半場和有逾2倍分頭，認真有得諗。