巴西哥倫比亞鬥大

猪拉多纳

尼馬法卡奧花旗國Show Time

兩大當紅南美勁旅會師花旗國，入波又點會少？國際熱身賽巴西對哥倫比亞移師美國新澤西舉行；巴西國際賽6連勝轟入24球勒都勒唔住，尼馬鬥心強、弗到爆，必喪攻哥軍；但對手神鋒法卡奧亦炙手可熱，恰到巴西中堅大衞雷斯，捧大盤！（周四早上8時30分開賽）

身為2014世界盃主辦國，巴西立心培育新生代，於兩年後問鼎冠軍寶座，後防堤亞高施華、大衞雷斯，中場奧斯卡杜斯山度士、拉美利斯以及國體會前鋒李安度達美奧，都係骨幹人物；而尼馬當然係領軍重心，上述數名主力今次都有入選大軍。
森巴明日之星博上位

呢班後生仔鬥心超強，一改以往「森巴兵團」熱身賽懶懶閒嘅陋習，近4仗除贏過死敵阿根廷外，更曾大數日本同中國，其中更大炒國足8粒，睇到佢哋唔會勒住，非常正氣。

哥倫比亞近年戰績起飛，目前於世界盃南美洲區外圍賽排第3，神射手法卡奧當然功不可沒。呢名馬體會射手，把握力勁到無倫，而且本季狀態無與倫比，不論為球會或國家隊上陣均永無欺場。猶記得佢於歐洲超級盃，為馬體會上陣殺敗車路士，當時將對手中堅大衞雷斯玩到謝，今次又係法卡奧Show Time！