京都爭升班 唔W唔掂

猪拉多纳

日乙煞科 甲府捧硬盃hea踢

贏就直升日職，輸就要打升班附加賽，你話京都不死鳥今日响日乙煞科戰，主場對住「一哥」甲府風林敢唔敢hea踢？實唔敢啦！咁仲唔博京都個1.87倍主W？

（開賽時間：周日中午12:00）

其實今季日乙早就形勢大定，甲府風林已經穩奪冠軍，町田澤維亞亦篤定降番落去JFL，剩低有競爭性嘅，就係日乙亞軍個直升資格，同埋升班、護級附加賽席位。京都家陣以73分排第二，領先湘南比馬1分，同埋大分三神、FC橫濱3分。換句話講，今日佢哋如果輸波，跟喺後面嗰3隊又贏嘅話，京都可能會跌落第5踢附加賽，所以今場唔贏就有排都未收得工，衰起上嚟仲會無緣日職添。

為咗咁，佢哋準備咗1萬張紫色、白色卡紙畀啲Fans，今日响球場砌個「J」同「1」字出嚟打氣，希望用地利同人氣驅「風」，實現升班夢想！
染谷悠太紮住上鬥志十足

有決心，但係京都有冇能力贏新鮮出爐嘅日乙冠軍甲府呢？由往績去睇，京都具備呢個條件，佢哋由2001年起8次主場對甲府，取得4勝1和3負，勝率起碼有5成，而且上半季作客甲府場波，京都就炒咗對方3蛋，似乎有啲格食格。

更重要嘅係，甲府攞咗冠軍之後，忙於祝捷、出紀念品多過練波，明顯有啲心散，至慘係今季入咗32球嘅頭號射手達維要坐波監，今日等於作客兼讓半臂，基本上夫添嘅京都，連上場左膊甩骹嘅後衞染谷悠太都話要紮住上，鬥心人腳俱備，呢個主W好難走得甩。