費倫當弗唔赦平庸AC

猪拉多纳

意甲AC米蘭主場對費倫天拿，當AC教練阿里基正為佢嘅飯碗忐忑不安，費倫天拿少帥蒙迪拿已經將球隊今季目標調升至爭取意甲冠軍，以兩軍目前狀況，AC就算主場出擊都冇贏波把握，Ali推介費倫天拿「讓球客勝」。

（周日晚10時開賽）

Ali一直係AC米蘭擁躉，對球會老闆貝魯斯干尼意興闌珊當然極之不滿，球隊今夏為錢將最佳中堅堤亞高施華同超級射手伊巴謙莫域賣畀巴黎聖日耳門，實在令fans心痛不已。我哋亦一直唔滿意教練阿里基嘅執教能力，雖然球隊喺近3場聯賽攞到7分，不過對手只係護級嘅熱拿亞、巴勒莫同基爾禾，阿里基本來仲為佢上輪大炒基爾禾5比1時，採用嘅新「4231」陣式沾沾自喜，不過到上周中歐聯即打回原形，球隊喺主場都贏唔到馬拉加，令出線前途蒙上陰影。AC喺未來半個月內惡戰連場，除今仗外，踢住仲要作客拿玻里、安德列治、主場對祖雲達斯同作客卡坦尼亞，只要一個不留神，面臨壓力嘅阿里基隨時帥位不保。
AC米蘭雙翼衞缺陣

AC今仗仲要陣容不整，一對翼衞右閘阿比迪同左閘安東連尼雙雙因傷缺陣，其中阿比迪位置更加係難以替代，防線不穩隨時畀費倫天拿有機可乘。

有趣嘅係，今晚帶領費倫天拿作客米蘭嘅少帥蒙迪拿，正係AC米蘭心儀嘅下季新帥人選，不過佢宜家唔理得咁多，費倫近期愈戰愈勇，近5戰4勝1和，包括上輪以4比1大炒之前4連勝嘅卡利亞里。球隊每周演出都有進步，蒙迪拿甚至有夢想挑戰意甲錦標。

費倫今仗亦有壞消息，主力射手祖維迪因傷缺陣，球隊攻力無疑受損，不過憑佢哋銳氣面對實力同狀態都變得平庸嘅AC米蘭，Ali相信佢哋依然足以保持不敗。
Ali 推介：

費倫天拿讓球勝 ★★★★

拉素平手盤 ★★★

國際米蘭上盤★★★