阿仙奴反彈富咸有難

猪拉多纳

周六晚英超又有倫敦打吡戰上演，今次由阿仙奴主場鬥富咸。近期阿仙奴走勢轉弱，若只計90分鐘賽事已經3場不勝。不過，度士相信阿仙奴唔會一直沉淪落去，好有機會喺今場打吡戰中大反彈，「讓球主勝」係唔錯嘅選擇。

（有線300及200台周六晚11時直播）
雲格最叻調教心理

阿仙奴近況差其實同作客有關，今次終於可以返回酋長球場作賽，成個局勢唔同晒。其實阿仙奴近期就算贏唔到，仍然會積極爭取入球，可見「兵工廠」鬥心未有半分退減。查實足球比賽並非純技術較量，尤其係高水平賽事，球員心理更係勝負關鍵。阿仙奴喺領隊雲格調教下，度士從來都冇擔心過阿仙奴球員嘅心理狀況，今場對住富咸你就會見到班「老虎仔」有幾惡。對手富咸確實與阿仙奴同分，但唔覺佢哋實力可比得上阿仙奴，更何況富咸作客成績麻麻，聯賽作客只得1勝，今仗未必可以威脅到阿仙奴。

傷停方面，阿仙奴就一定缺少停賽嘅中場韋舒亞，但估計影響唔會太大。富咸就有中場馬哈馬度迪亞拉膝部受傷，領隊祖爾話未確定佢能否出場。另外威爾斯球員西蒙戴維斯仍未完全康復，今場會繼續休息。