西布朗下盤值得根進

猪拉多纳

世事真係變幻莫測，好多嘢都估佢唔到！本季英超羅渣士高調轉教利物浦，以為紅軍可以復甦，但演出一直未如人意。西布朗搵嚟「千年老二」、從未做過正領隊嘅奇勒帶隊，以為會搞到一鑊泡啦，點知就教到班波曉飛。

西布朗一開季就先聲奪人，面對利物浦贏夠3比0，好多人都以為只屬虛火，但球隊卻愈踢愈有紋路，打和熱刺、擊敗愛華頓，對住曼城都係僅僅輸波。近兩場西布朗出戰紐卡素同修咸頓，細鬼都有作現場評述，發覺佢哋已經轉踢地波，普遍球員都信心爆棚，長短傳送都好到位，再唔係好似以前高Q大棍咁亂嚟，難怪成績穩步上揚，依家已排緊積分榜第5位，成績令人驚喜。
韋根讓波唔合理

睇番班波中前場幾齊腳，盧卡古夠件頭衝得走得，沙恩朗踢法刁鑽聰明，到上場連奧丹維治都打起埋，省兩粒搞掂「聖人」。目前球隊士氣高昂，真係要畀個Like領隊奇勒至得。今晚西布朗作客韋根，主隊狀態雖然唔錯，但呢班波始終斤両有限，好難長期維持好表現，呢場讓平半有啲過分，咁細鬼當然推介西布朗下盤畀大家啦！

（有線302及202台周六晚11時直播）