紅軍立立亂 安治乘機搶W！

猪拉多纳

歐霸盃分組賽A組重頭戲由俄超霸班安治，喺主場迎戰英超名牌利物浦。傳聞「紅軍」因為戰績不振，將會喺冬季轉會市場大換血，連効力7年嘅門將連拿都冇得留低，安治見機不可失，放煙幕話要收購中堅史卡迪爾擾亂對手，隨時陰謀得逞開主W。

（有線61、64、201及204周五凌晨1:00直播）
安治放風撬史卡迪爾

現時利物浦喺英超排第12位，使咁多錢買人，排名仲低過窮到燶嘅死對頭愛華頓，新領隊羅渣士仲未炒魷已經要還神。雖然距離1月轉會市場重開未有耐，但有關「紅軍」換血嘅傳聞可以話鋪天蓋地，前鋒杜奧巴、丹巴巴亞、史杜列治、禾確特同中場奧邦拿全部同佢哋扯上關係。

之不過，羅渣士上任前已收到柯打話要削減薪酬支出，要買人難免要賣人清洗減磅，俄羅斯消息話，安治睇中曾經踢過辛尼特，熟晒俄超地頭嘅「紅軍」中堅史卡迪爾，總監卡路士一向有計，係咪放煙幕擾亂對手，只有佢自己先知。同時間，據講「利記」又睇中韋根門將艾哈比斯，即係話今季表現不穩嘅連拿好可能被趕扯，副選巴利鍾斯亦繼續坐冷板，咁搞法，士氣想好都幾難。
謝四 蘇亞雷斯冇隨隊

對家安治，除咗話有星級射手伊度奧孭飛，中場施哥夫同中堅基斯杜化森巴亦踢過英超，根本唔怕利物浦。更何況，「紅軍」跟手要喺聯賽作客硬撼車路士，隊長謝拉特同前鋒蘇亞雷斯冇隨隊，中場祖亞倫、史達寧同左閘荷西安歷基等主力多數唔會落場，加上陣中傷兵唔少，暫時利物浦有6分位列A組榜首，應該唔介意輸番場。
安治歐戰主場威力勁

‧安治近4場歐洲賽主場全勝，期間冇失波。

‧安治連續3仗開半場入球大、全場入球大。

‧利物浦過去8次對俄羅斯球會得5勝1和2負。

‧紅軍近4場半場領先兩次打和、兩次落後。

歐霸盃A組