國米強襲柏迪遜

猪拉多纳

「新哥迪奧拿」挾9連勝魔法

歐霸盃第四輪分組賽今晚上演，H組「新哥迪奧拿」施特拉馬斯安尼將率領國際米蘭作客塞爾維亞柏迪遜，呢位當紅少帥近期認真威威，成功幫國米喺意大利國家打吡作客擊敗祖雲達斯，年紀輕輕已盡展魔法帶領國米踏上復興之路，令班球員信心爆燈，今次大軍挾9連捷佳績出戰歐霸盃，有力喺作客環境下再贏柏迪遜，寧捧當頭起，捧客勝！

（有線61及201台周五凌晨4時05分直播）
施特拉馬斯安尼熱爆意甲

36歲嘅國際米蘭教練施特拉馬斯安尼靠帶領國米青年軍贏U19歐聯冠軍上位，上季坐正初期都畀人質疑領軍功力，不過佢協助球隊錄得9連勝佳績，當中以上場戰勝死敵祖雲達斯含金量最高，施帥一戰奠定星級少帥地位，更被部分傳媒封為「新哥迪奧拿」，人氣甚勁！呢位年輕教頭靠歐洲賽彈起，當然希望喺歐霸盃進一步確立地位，再講，國米如果今場能成功擊敗柏迪遜，而同組尼菲治未能擊敗魯賓卡山，佢哋就能提早獲得晉級資格，相信「藍黑兵團」會好好把握機會，以勝利為目標。

另一方面，近期盛傳國米會長莫拉堤有意喺暑假引入新資金，為塑造良好形像，令財團對球隊更加信任，施特拉馬斯安尼有必要帶領球隊喺大型賽事交出好成績。以往好多意甲球隊都對歐洲次級賽唔多着緊，如歐霸盃之流，不過國米現今情況唔同，唔會放過任何表演機會。留意到近年國米整套營運方式都有所改變，唔單止改善球迷精品銷售策略，更經常派員到中東及中國作親善交流，以開闢新財路引入資金，歐霸盃獎金唔錯，廣告收益亦比聯賽為高，故同被列作球隊搵銀計劃之一。
柏迪遜主場冇威勢

柏迪遜喺塞爾維亞就也文也武，但當地聯賽水平唔高，就算隔離勁啲嘅克羅地亞，班霸薩格勒布戴拿模喺歐聯都係咁畀人劏，證明呢類「前南」球隊依家唔多夠班。柏迪遜主場對同組最弱嘅尼菲治都贏唔到，對住國米勢必捱打。