薩克達格食格

猪拉多纳

4231陣鍊贏車仔

車路士、祖雲達斯兩強分別主場出擊，但未必食硬對手！歐聯E組兩戰，重頭戲係車路士主場對薩克達，車仔近期防線唔掂，相反烏克蘭奇兵薩克達愈踢愈有，踢法有格食格感覺，受讓揀「讓球客勝」。（有線64及204台周四凌晨3時45分直播）

車仔自上輪歐聯作客薩軍被技術性擊倒後，於法定時間未贏過，整體狀態平平，其中兩戰曼聯上演入球騷，證明防線不穩，而上場聯賽作客史雲斯亦臨尾香，連運勢都輸埋。
車仔打硬仗唔掂

其實車仔打硬仗能力絕對值得懷疑，雖然今季於英超保持水準，除不幸輸畀曼聯外，其餘對阿仙奴及熱刺等大戰都能夠贏波，但踢歐洲賽就現形，歐聯分組賽主場2比2被祖雲達斯逼和，上輪作客薩克達更被技術性擊倒輸1比2，唔好忘記之前仲有場歐超盃大敗畀馬德里體育會，所以今晚大家唔好睇得車仔咁高。兼且車仔今季改踢4231地面進攻，薩克達近幾年都係踢呢個陣式，對車仔絕對格食格o架！

另一場祖雲達斯主場對丹麥洛斯查蘭特，祖記近期亦唔多掂，近期意甲對卡坦尼亞及博洛尼亞，都係靠球證誤判及行尾運先煲到魚生粥，上仗終於頂唔住，主場被國際米蘭反勝3比1，年半意甲不敗紀錄終於斷纜。其實意甲水準近年不斷下滑，意甲兵出戰歐洲賽優勢每況愈下，依家祖記陷入小低潮，今場隨時創造歐戰10連和都唔奇。
祖記死火3.5球博細

洛軍初戰歐聯，整體演出算不俗，主場吞車路士4蛋都唔係完全冇得踢，另外兩場分組賽都開細。佢哋離開主場必死守，首輪作客攻力強橫嘅薩克達都係輸0比2，今場大細中位數調高至3.5球，開細盤機會高唱入雲。（周四凌晨3時45分開賽）