曼城-1保士途

猪拉多纳

生死戰拋開分歧

歐聯死亡D組另一場重頭戲，英超王者曼城分組賽3戰1分深陷危機，今輪主場鬥阿積士非勝不可，教頭文仙尼盡失民心，嗌唔郁班兵，但班球員都要向老細同球迷交代，無論有乜分歧，去到關鍵時刻都要暫時團結做番啲嘢，信曼城質高W得，博「讓球主勝」！

（有線64及204台周三凌晨3時45分直播）

曼城上次輸畀阿積士後爆發內亂，米卡李察士及尼史葛等土炮作反不成，前者傷咗，後者被雪，文仙尼叫做暫時平亂。曼城呢啲富貴人家表面風光，其實內部混亂，上至高層，下至將帥，個個勾心鬥角，你估泰維斯真係服文仙尼咩！我亦唔覺得班球員想同文帥契仔巴洛迪利夾囉，不過，出嚟搵食利字當頭，呢度勝在薪高糧準，你鍾意畀「腦殘」攪亂檔咪用佢囉，反正隻鑊又係你自己孭番！

文仙尼喺今場關鍵戰役賽前又發噏風，話班球員之前3場分組賽踢得好曳，欠咗佢喎，大佬，又唔係你出糧，欠你咩啊？頂多咪欠咗老細同球迷！家陣曼城陣內冇乜人會聽文帥支笛，但班球星行走江湖多年，盜亦有道，（手豆）得天價人工，都要喺呢類大戰出吓力，前線阿根廷雙星阿古路同泰維斯始終有級數，仲有全能中場耶耶托尼支援，雖然大衞施華未好番上陣成疑，但要喺主場贏阿積士唔難啩！
阿積士難爆第二次

阿積士上次喺主場踢出超水準爆冷砌低曼城，佢哋啲反擊確係做得唔錯，今次將會故技重施，專心防守等機會偷雞，同一招用兩次唔係唔得，但喺作客環境下效果肯定冇咁好，可一不可再！只要曼城班大哥生生性性，認認真真發揮正常水準，贏波唔成問題，贏兩球以上都係合理戰果！