皇蜂大激鬥

猪拉多纳

艦隊開Turbo衝首名

今輪歐聯激戰連場，其中以死亡D組皇家馬德里主場硬撼多蒙特最為矚目。「銀河艦隊」上輪作客輸畀多蒙特，為爭首名出線，今返主場一定搏盡喪攻，加上王牌C朗剛喺聯賽食白果，谷埋成肚氣，實搵「蜜蜂兵團」發洩。適逢客軍三線作戰疲態畢露，主力中堅曉姆斯又成日受傷，影響防線演出，皇馬仲唔有仇報仇入多幾粒咩？入球大值博！

（有線61及201台周三凌晨3時45分直播）

眾所周知，皇馬今季頭號目標係重奪歐聯桂冠，上輪作客多蒙特畀人圍住嚟攻，其中串演左閘嘅艾辛慘成缺口，只係輸一球差距已經偷笑。依家皇馬喺死亡D組落後榜首多蒙特一分，想爭首名今仗不容有失。
多蒙特反擊銳利

日前「銀河艦隊」喺聯賽大勝薩拉戈薩4粒，唔單止希古恩、迪馬利亞有入波，連艾辛同莫迪歷都開埋齋，偏偏全場怒射九腳嘅C朗顆粒無收，當堂冇晒飛士。滿腔怒火之下，今仗誓當多蒙特門神維丹費拿係箭靶咁射。由於艾比路亞傷愈復出，算係暫解左路防守危機，但仍要用新仔華拉尼打中堅，防中基迪拉又上陣成疑，因此後防唔係好穩陣。

多蒙特因三線作戰關係，狀態明顯跌Watt，隊長基爾喺上仗聯賽被批（月爭）撞爆個鼻，今仗就算上陣都要戴住面具披甲，但佢嘅防中拍檔施雲賓達則因傷倦勤，勢必令防線飽受壓力。而中堅曉姆斯今季經常受傷，唔多唔少都影響狀態，加上全隊得佢、蘇保迪同菲臘比辛坦拿三個中堅輪換，唔傷都攰死喇，頂唔住C朗、賓施馬、迪馬利亞嘅狂轟猛炸。

好彩「蜜蜂兵團」羅拔利雲度夫斯基、馬里奧葛斯、馬高列奧斯反擊銳利，作客巴拿貝唔會坐以待斃，今場主攻、反擊格局鮮明，預計入波唔會少，大盤好路。