華倫 馬體會做大Show

猪拉多纳

蝙蝠王蘇爾達杜 Vs 猛虎法卡奧

你有法卡奧，我有蘇爾達杜！「蝙蝠軍團」華倫西亞今晚喺主場迎戰西甲「二哥」馬德里體育會，捧1.77倍入球大，事關兩軍前線都有把尖刀喺手，加上雙方後防都講唔上相當穩健，撐入球大合情合理！（now632台周日清晨5:00直播）

華倫今季成績麻麻，唔多唔少同佢哋分心歐聯有關，歐聯第一仗作客輸畀拜仁慕尼黑，不過近2場爭氣贏番，喺歐戰成績唔錯，證明「蝙蝠軍團」唔係善男信女。睇番華倫每逢踢完歐聯之後嘅比賽全數落敗，你話踢歐聯冇影響，張峰打死都唔信！不過，好彩佢哋主場成績見得人，今季主場4戰3勝1和攻入12球，前線尖刀蘇爾達杜喺歐聯連中三元後信心爆棚，攻擊力絕對值得信賴。
法卡奧頭頂腳踢瓣瓣精

雖然火力唔弱，但華倫後防甩漏亦多，相信呢個就係隊波成績唔好嘅主因，睇番佢哋4場主場聯賽出戰實力一般嘅球隊，都失咗6個波，今晚面對法卡奧咁有卡士嘅前鋒，後防想保住不失唔易！

今季馬體會成績非常突出，踢咗咁多場比賽，無論係聯賽定歐霸盃，前線冇一場食白果，雖然「老虎」法卡奧未去到美斯咁屈機， 但就一定稱得上瓣瓣有，埋門把握好、左右開弓、頭槌了得，原來連罰球功夫都咁到家，見佢可以喺射手榜追住美斯同C朗就知幾咁厲害。今晚一於睇吓蘇爾達杜同法卡奧邊個士哥多，入球大唔使考慮啦！
馬體會Fit爆要埋客W

雖然華倫今季喺自己地頭仍然未輸過，但睇番佢哋嘅對手，只係切爾達、薩拉戈薩同今季大跌Watt嘅畢爾包，今次惡鬥聯賽8勝1和嘅馬體會，先至係真正考驗，不敗紀錄極有可能畀法卡奧終止，不妨補多注2.58倍客勝！
華倫地頭旺開大

‧若馬體會今場贏波，就會打破96年創下嘅球會聯賽最佳開季成績。

‧馬體會開咧至今9場聯賽中，有6場至少出現3個入球。

‧華倫主場4戰有3場開入球大。
張峰來料：華倫西亞（入球大）

張健峰

今季加盟日之泉JC晨曦的港腳張健峰，擅打左中場及左後衞多個位置，除了罰球有一手，最拿手係推介歐洲足球。