車仔史雲斯玩大佢

猪拉多纳

今輪英超最矚目嘅大戰當然係曼聯對阿仙奴，但榜首車路士作客「天鵝」史雲斯，可觀性亦唔輸蝕。車仔進攻瓣數多，夏薩特、奧斯卡杜斯山度士弗爆，加埋「王子」復出，近期入波停不了，今場有力開出9連大。史雲斯亦唔係人咁品，本季主場開大率100%，大盤好路！

（有線300及200台周六晚11時直播）
火力強橫連開8口大

車路士近期兩鬥曼聯先苦後甜，上輪聯賽被迫以9人應戰，輸波都冇話可說，幸周中聯賽盃強陣出擊成功復仇，兩名新將夏薩特同奧斯卡杜斯山度士好生猛，拉美利斯亦非常活躍，最後加時淘汰曼聯表現有說服力。雖然賽程頻密，但兩戰紅魔鬼都係主場出擊，今次仲有費蘭度托利斯同伊雲洛域兩名大將復出，陣容完整下又有力瘋狂數胡。睇番車仔賽績，佢哋連聯賽盃、歐聯同聯賽，已經連續開出8口大，既然車仔大踢開放足球，預料今場入波亦會繼續嚟。
主場出擊有前冇後

史雲斯雖然冇咗教頭羅渣士，但後者近年已打好球隊基礎，所以米高盧特立本季接手完全唔難教。米帥買入嘅米捷、柏保路靴南迪斯同寄誠庸，可謂又平又靚，已經成為球隊正選，實際演出令人滿意。

米高盧特立一向崇尚進攻足球，尤其主場出擊嗰陣更加有前冇後攻到對手氣咳，因此入波絕對唔會少。翻查球隊本季6次主場出戰，最後全數開大，細鬼預計佢哋入到車仔波，既然兩隊都咁攻得，捧大最啱數。