賓約哥焗砌蔚山奉陪玩大佢

猪拉多纳

首回合領先3:1，蔚山現代今日响亞冠盃四強次回合，主場對住焗攻嘅烏茲別克來客賓約哥，大把機會打反擊，呢場波一定唔會冇交收，1.65倍入球大抵玩過1.47倍主W。

（now671台周三晚6:30直播）
蔚山聯賽留力收起11件主將

背負住「韓國足球榮譽」重擔嘅蔚山，為咗打入亞冠盃決賽，可以話乜都做得出，好似早兩日佢哋作客水原藍翼場K聯賽，教練金鎬坤居然狠到收起李根鎬、李浩、郭泰輝、金永光、金信旭、拉芬夏等11個正選，用晒後備甚至青年軍敷衍了事，呢種做法响英超肯定畀人罰錢警告，但係佢哋就若無其事好似奉旨咁，仲直認係為今場波留力添，由此可見，蔚山以至整個南韓球圈係幾睇重今日場大戰。

由於抖到足晒，蔚山今日雖然唔輸多過兩球都入到決賽，不過佢哋唔準備打守勢穩陣波，事關2006年亞冠盃4強蔚山就試過首回合贏3:2，次回合返到自己地頭玩龜縮，結果畀全北汽車炒咗4:1冇咗個決賽席位，所以金鎬坤下令叫蔚山班人以贏波做目標，九成九會同賓約哥搏拳，呢啲環境開個入球大有乜難呀？