銀河二隊半場玩殘丙組仔

猪拉多纳

皇家馬德里今晚喺西班牙盃第4圈首回合作客丙組仔艾高恩奴，為迎接嚟緊頻密嘅賽程，主帥莫連奴毫無疑問會派出唔少副選，但有卡卡等星級後備帶住班波，相信「銀河二隊」一開波就會全面控制戰局，1.95倍半場大穩陣。

（now632台周四清晨5:00直播）

上場皇馬作客馬略卡兵不血刃大勝5:0，主帥莫連奴喺賽後記者會都話隊波重回正軌，今仗出戰丙組仔，重要性當然不及稍後聯賽對薩拉戈薩同歐聯再戰多蒙特，不過有卡卡、莫迪歷同賓施馬呢啲「國腳級後備」落場，實力同鬥志仍有保證，極可能擔正攻堅嘅荷西卡利祖都話：「盃賽係另一個戰場，身為皇馬球員嘅我哋會奉獻所有。」
艾高恩奴開P恭迎皇馬

對手艾高恩奴都好重視今場波，臨時搭建1,000個座位之餘，兼夾幫佢哋個無遮無擋嘅球場起晒圍板，又賣埋專用打氣頸巾，仲邀請西班牙網球名將「蚊子」費拉羅主持開球禮，包裝到成個嘉年華咁。雖然佢哋最近喺西丙造出6連勝，但對住皇馬都係當開吓P算數啦。