戴拿模「+1」撲火

猪拉多纳

美職季後賽正式上演，率先進行首圈東岸四強席位爭奪戰，由芝加哥火燄主場對侯斯頓戴拿模。今場比賽一場過決勝，而芝加哥火燄有主場之利因常規賽排名較高。兩支球隊實力相當接近，侯斯頓戴拿模就算作客亦有力一戰，受讓可捧「讓球客勝」。

（周四早上9時開賽）
火燄季尾愈踢愈沉

芝加哥火燄喺常規賽面對侯斯頓嘅賽績為四勝五和六負，而將數據收窄至主場的話，芝加哥火燄就只得兩勝三和三負，從數字上反映出主場對賽無優勢可言。另外球隊近期演出令人失望，近五場輸三次，球員狀態似乎有所回落，如今去到一場過生死戰確令人擔憂，加上今戰哥利基比斯右膝受傷缺陣，唔多唔少會影響到芝加哥火燄競爭能力，實在芝加哥火燄爭勝條件未算充裕，今場讓唔起侯斯頓戴拿模。

以常規賽數據所見，侯斯頓戴拿模作客演出確實較差，但好彩嘅係芝加哥火燄主場又唔強，主客因素算係扯平。如果計人腳質素，侯斯頓戴拿模絕對唔會比對手差。除了程拜仁之外，前鋒韋爾布恩亦躋身常規賽神射手榜頭十位，至於巴特戴維斯就係常規賽助攻榜並列第四球員。只要侯斯頓戴拿模球員有正常發揮，作客贏埋芝加哥火燄都唔奇。
美職季後賽賽制

首圈由兩岸第4及第5位球隊以一場過決勝，爭奪四強席位對兩岸一哥。至於東、西岸四強及決賽採取主客兩回合制，若兩回合打和，不設作客入球，需要進行30分鐘的加時賽，加時後仍未分出勝負則以互射12碼定勝負。總決賽則以一場定勝負，若法定時間內不分勝負，將進行30分鐘的加時賽，加時後仍未分出勝負則要互射12碼定勝負。