聯賽愈頹 打吡愈醒！

sherry

史上第219次默西賽德郡打吡戰撐紅軍！英超利物浦作客愛華頓，經季初一輪磨合，紅軍新將、小將逐漸成才，又擁有「利市大佬」風範、信心，近11次打吡法定時間之內僅輸1次，狀態幾低迷都食住死敵；主隊大將費蘭尼上陣成疑，平手盤捧利物浦！

（有線200及300台周日晚9時30分直播）

兩軍每季對碰都係矚目大戰，雙方球員無論當時狀態、排名如何，落到場都進入忘我境界，黃、紅牌出現次數特多。紅軍於80年代稱霸英格蘭球壇，成績長期食住死敵，但近兩季情況有變，上季「拖肥糖」聯賽排名較高，今季更加升呢，領隊莫耶斯講明以打入前四為目標；相反紅軍目前僅位處中游，人腳更非常緊絀，上周先打開英超主場勝利之門。

往績壓拖肥
雖然排名較低又要作客，但今場紅軍喺「讓球主客和」仍要「-1」，莊家並非無的放矢。利物浦本季打起史達寧、舒維爾、蘇索等小將，而借將紐尼沙軒亦已入局，連後備門將巴利鍾斯亦功架十足，就算連拿繼續養傷都冇有怕。連歐霸賽事，利物浦近兩仗贏晒，最難得係均保持清白之身，狀態明顯冒升。

愛華頓季初係威係勢，但費蘭尼受傷缺陣下侵略性大減，已經連和兩場。「爆炸頭」已經復操，但久傷後狀態當然爭咁啲；派拿停賽創造力更低。愛華頓守強攻弱，主場都未必有着數。

半場極旺細
踢打吡戰，心理質素最重要，利物浦有「大佬」底氣，自08/09球季起計，連盃賽11次對戰，10場於法定時間之內未輸過，英超近5次造訪死敵贏4次。去季利物浦兩鬥愛華頓前，分別都經歷兩連敗，但最終都擊敗愛華頓，於足總盃四強更反勝死敵，呢啲就係贏心理質素！

另外，兩軍往績極旺半場細，近11次對碰半場入波最多一粒咋！

近11次默郡打吡成績
球季 賽事 戰果（半場）

11/12 英足盃* 利勝2:1（0:1）

英超 利勝3:0（1:0）

英超 愛負0:2（0:0）

10/11 英超 利和2:2（1:0）

英超 愛勝2:0（1:0）

09/10 英超 利勝1:0（0:0）

英超 愛負0:2（0:1）

08/09 英足盃 愛和0:0（0:0）

英足盃 利和1:1（0:1）

英超 利和1:1（0:0）

英超 愛負0:2（0:0）

*為中立場