新特蘭兄弟波受讓筍

猪拉多纳

細鬼每周都要為電視台做現場評述，但喺英超有時都會搞錯兩隊波，就係史篤城同新特蘭。論人腳、講踢法，佢哋已似到十足，最頂癮係兩隊件主場波衫都係紅白直間，簡直好似孖生兄弟一樣。今輪兩軍聯賽對撼，睇怕都幾難分到勝負。

（有線201及301台周六晚10時直播）
史篤城欠強攻本錢

史篤城有幾硬淨，其實都唔使再多介紹。呢班波本季和過阿仙奴、曼城同利物浦，緊身攔截踢法令勁旅吃盡苦頭，係上場對曼聯有啲失準。呢類型球隊最啱踢下風波，受讓簡直啱晒胃口；但因為攻力唔強，如果要讓波就濕滯，佢哋本季踢咗九場，只係贏得一場咁大把。

今輪主場出擊對新特蘭，主W得1.8倍，盤口讓半球並不值博。頭先都講過，新特蘭根本就係翻版史篤城，而且「黑貓」贏盤率高，本季頭六場都贏盤；之前作客曼城冇錯係受讓之下大敗，但對手實力太強，根本唔可以作準。新特蘭上場於補時階段逼和死敵紐卡素，得以保持士氣，加上本季僅得一敗，今次又到受讓場合，捧「讓球客勝」同細盤。