馬體會法卡奧演「科」騷

猪拉多纳

老虎出山，當然要撐！歐霸盃分組賽今晚好戲連場，西甲「阿二」馬德里體育會喺B組主場迎戰葡超球隊科英布拉大學，1.47倍「讓主」抵追。馬體會之寶法卡奧今季風頭拍得住美斯同C朗，據講球會已準備放人，並羅致曼聯嘅查維亞靴南迪斯頂檔，外號老虎嘅法卡奧當然要繼續騷哥利，以提升身價！（有線63及203周五凌晨3:05直播）
搵科大祭旗抬高身價

作為連續兩屆歐霸盃神射手，法卡奧喺今年暑假轉會市場唔算好搶手，所謂斟介多數只聞樓梯響，但佢喺馬體會日前以1:0打沉皇家蘇達斯，出動埋罰球絕殺對手後，身價好似香港樓市咁又勁升，消息話馬體會準備將佢標價6,000萬歐元，而車路士亦表明有興趣，搵佢嚟頂替日漸跌Watt嘅費蘭度托利斯。

今次唔似吹水，事關報道話馬體會打算以先借後買方式，羅致今季喺曼聯坐多過踢嘅「小豌豆」查維亞靴南迪斯，為出售法卡奧做好準備。原本法卡奧已經入球停不了，呢個時候為提升叫價本錢，有咩理由會手軟？對家科大近期表面睇落似有起色，但砌低嘅高維拿同邦迪巴卡只屬魚腩，作客注定畀老虎咬死。

歐霸盃B組