「福星」柏迪遜歐戰作客波輸晒

猪拉多纳

近況回勇寫下5連勝佳績嘅國際米蘭，今晚喺歐霸盃H組主場迎戰「福星」柏迪遜，要大勝一場話咁易，事關柏迪遜對上12場歐戰分組賽作客波全部輸晒，一離開地頭根本唔識踢波。最緊要係國米過往喺歐洲賽撞親柏迪遜唔只未輸過，踢到最後仲要例牌捧盃而歸，可謂大旺「籃黑兵團」，今場1.92倍「讓球主勝」記得捧場！（有線61、201及廣東體育周五凌晨1:00直播）
卡斯辛奴重拾射門鞋

國米喺1964年嘅歐冠盃同1990年嘅歐協盃合共同柏迪遜踢咗4場，結果取得3勝1和佳績，所贏3場全部贏2球或以上，最終更分別喺嗰兩屆賽事攞埋冠軍。其實就算唔計迷信嘢，近排取得5連勝嘅國米喺射手卡斯辛奴重拾射門鞋後，已經重現昔日強隊本色，加上有主場之利要大勝有幾難？

至於柏迪遜呢邊，最具實力嘅其實唔係班波，反而係佢哋班狂迷Fans。米蘭市警方已經將今場列為高危賽事，深怕來自柏迪遜嘅4,000名球迷搞事。睇番紀錄，呢支塞爾維亞球隊過往13次對戰意大利球隊只得1勝，今屆歐霸盃連外圍賽3次作客波全輸，最恐怖係佢哋對上12場歐洲波分組賽作客又係1分都未攞過，實力所限，今晚憑乜偷雞先？

歐霸盃H組