平手博蔚山

猪拉多纳

亞冠盃4強首回合西亞、東亞大戰爆發，烏茲別克代表賓約哥今晚喺主場對南韓嘅蔚山現代，未必攞到頭彩。雖然中日韓球隊連環冧檔，不過「K-League自尊」蔚山因為得到韓職聯賽會關照，上場聯賽提早喺上周中舉行，教練金鎬坤可以提早出發現場吼路，平手盤捧得過！（now671台周三晚9:00直播）

浦項制鐵喺09年捧盃、10年到城南一和，上屆全北汽車屈居亞軍，現時蔚山背負嘅唔止係首次稱霸亞冠盃壓力，韓職以至東亞足球尊嚴都要靠佢哋捍衞。雖然蔚山陣容唔算得豪華，不過中鋒金信旭、中場李根鎬同中堅郭泰輝都係國腳級，今場仲要Full Team添！
賓約哥後衞坐波監

除此之外，射手拉芬夏同李根鎬一樣効力過飛腳，佢兩個喺8強兩回合夾埋入4球，最重要係蔚山教頭金鎬坤已經喺上周四出發到烏茲別克，現場直擊賓約哥以1:0擊敗拿夫巴賀嘅比賽吼路，蔚山球員就喺上周五拉隊到烏茲別克適應環境。

賓約哥已經唔係史高拉利執教嘅時代，近年已經唔再大手買人，最大牌球星就只得曾經以外借身份効力西布朗嘅斯洛伐克中場高沙克，連澳洲中場大衞卡尼都選擇離隊跳船，後衞加夫洛夫停埋賽就更加咪睇高。
南球盃賽制

採主客兩回合制，今輪為16強次回合，若總比數相同，作客入球較多一隊晉級，再和則於次回合後隨即互射12碼決勝。
中冠盃賽制

24支球隊分8組踢雙循環分組賽，每組首名躋身8強淘汰賽。
亞冠盃賽制

採主客兩回合淘汰制，今輪為4強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。