槍手射爆史浩克

猪拉多纳

酋長無敵！英超勁旅阿仙奴喺佢哋個酋長球場惡過老虎，自06年啟用後踢親歐洲賽從未輸過畀外地球隊，歐聯分組賽主場勝率更達84%，今晚喺歐聯B組主場迎戰史浩克，撐硬1.9倍主W！（有線64及204周四凌晨2:45直播）

阿仙奴上仗喺英超輸畀金絲雀，排名跌到落第9位，以為佢哋衰到貼地捧唔過？未必！查實佢哋今屆2場歐聯分組賽都順利贏波，今晚對住史浩克，仲有個最強主場做後盾添！睇番數據，原來「兵工廠」自06年搬竇後，同期嘅歐聯主場勝率係冠絕群雄，當中踢咗19場分組賽錄得16勝3和，近年唯一嘅歐聯主場敗仗只曾出現喺09年嘅淘汰賽，不過砌低佢哋嘅係曼聯，換句話講，非英超球隊嚟到酋長球場根本冇運行。
史浩克內田客串中堅靠唔住

再者，「兵工廠」近排雖然傷兵不絕，阿歷士張伯倫、沙格拿、戴亞比、路斯基同禾確特都未踢得，但其實剩番嘅有限人腳都有一定實力。特別要講嘅係今夏加盟嘅3名外援，踢歐戰例牌交足貨，普多斯基喺歐聯入咗2粒，基奧特則交出2次助攻，仲有辛迪卡索拉策動攻勢，有佢哋壓陣，就算領隊雲格要繼續服刑停賽，一樣冇有怕！

依家排德甲第3嘅史浩克，上周末喺魯爾區打吡砌低多蒙特的確精彩，不過大戰過後，可唔可以即刻回到氣再砌「兵工廠」，真係幾令力奇擔心，特別係佢哋歷來5次作客英格蘭得1和4負，今晚去到惡爆嘅酋長球場，仲要有正選中堅柏柏杜普路斯養傷，騎呢到由身材唔算高大嘅內田篤人移入中路頂住，想唔輸都幾難。

歐聯B組