撐賓菲加幫我報仇！

猪拉多纳

歐聯進入第3輪分組賽，各隊表現大家已經睇過，對投X應該有幫助。喺上輪嘅分組賽中，我就拍晒心口向朋友推介莫斯科斯巴達主勝，最終呢班波以2比3慘敗喺些路迪腳下，畀朋友笑到面黃之餘自己仲要輸錢，所以今晚呢班衰人主場對賓菲加，我就反主隊，要「賓仔」幫我連本帶利贏返先得！（有線61及201台周三凌晨零時直播）
斯巴達有前冇後等劏

上輪莫斯科斯巴達對些路迪，主場出擊果然打出主場氣勢，上半場初段完全主導比賽，當時仲好放心以為收到錢。點知對方一個突擊就先偷你一球，縱使下半場曾一度反領先2比1，但其後斯巴達先有迪米捷甘巴洛夫擺烏龍，臨完場時再被森馬拉斯入波絕殺，斯巴達最終1分都冇！其實莫斯科斯巴達進攻都有睇頭，中場有愛爾蘭嘅麥基迪同瑞典國腳卡士唐等等助陣，巴西翼鋒艾利亦滿場飛，可惜後防不穩以致入埋都唔夠失，輸畀些路迪就係最佳例子，至今12場聯賽失咗成20球咁多。由於頭兩輪都冇分落袋，今晚莫斯科斯巴達預計會踢得更進取，我敢寫包單一定失波！

對手賓菲加今季表現對辦，聯賽4勝2和保持不敗，最緊要係今場大軍名單中喜見巴拉圭射手奧斯卡卡度素復出！另外要留意西班牙U21國腳洛迪高摩連奴，剛啱喺U21國際賽食出「大四喜」，喺葡超亦有3球進帳。雖然「賓仔」喺呢組未入過波，但實際上擁有呢兩位高質射手，進攻火力不比莫斯科斯巴達差，而且佢哋暫時只得1分喺手，加上主場之利，今戰絕不會龜縮，投X入球大最明智！

留意讓球賠率，今場開出平手而客隊低水，盤路非常合理。當聯賽只排中游嘅莫斯科斯巴達，所謂人造草主場連些路迪都贏唔到，今次憑咩贏波？除捧入球大之外，平手盤亦可諗諗客隊。

Wendy推介：賓菲加大、平手盤