馬體會跌Watt 老貓燒「蘇」

猪拉多纳

西甲今年除咗巴塞同皇馬，仲有隊馬德里體育會都好犀利，不過佢哋似乎逃唔過所有突然冒起球隊嘅命運─被列強瓜分球員，以王牌前鋒法卡奧為首嘅多位主力，近期頻頻傳出被挖角消息，想話唔影響軍心都冇人信。今晚佢哋作客皇家蘇斯達，對手今季演出唔錯，主場出戰特別醒神，今晚有能力喺馬體會身上搶分，我相信皇蘇會立於不敗之地，1.78倍「讓主」信得過。

（now632台周一凌晨3:30直播）

無可否認馬體會季初表現亮麗，特別係攻擊火力特強，場場攻入2球以上，不過馬體會近期氣勢回落，好多場波都係僅僅熟，入波一球起兩球止，表現無復季初銳氣，始終踢波都有狀態回落嘅時候，今晚作客皇蘇，相信會遇到考驗。其實馬體會跌Watt，同班主力被挖角不無關係，最近盛傳車路士落柯打1月買法卡奧，曼城領隊文仙尼又入場睇辦，皇馬又話要先買佢50%擁有權，試問球員點可能專心比賽？仲有阿祖安盧比斯亦畀阿仙奴睇到實，利物浦都想簽阿達杜倫，真係聽見都覺得恐怖！
皇蘇卡路士韋拿腳風順

主場往往係中游球隊搶分嘅殺着，無他嘅，只要自己地頭踢出咗氣勢，就算實力高一班嘅球隊作客嚟到，都會感到無形壓力，今季皇蘇正正就係呢種球隊。論近況，上周作客貝迪斯雖然輸0:2，但係睇番個戰情，皇蘇其實係佔優嘅一隊，只係遇着一個踢到上晒身嘅門將先至落敗收場。返到主場，皇蘇已經喺地頭取得3連勝，墨西哥前鋒卡路士韋拿亦愈踢愈順，由助攻王變埋做數胡能手，今場係時間發威，展示一下主場威力。 一場勢均力敵嘅比賽，睇吓皇蘇可唔可以憑主場之利打老虎，坐和望贏下受讓抵玩。
皇蘇主場防守硬淨

‧近7次主場對賽中，皇家蘇斯達只係輸過2次。

‧馬體會射手法卡奧嘅射門入球率達32%，比美斯、基斯坦奴朗拿度及尹佩斯等射手更高。

‧皇家蘇斯達至今3次主場賽事僅失1球。
張峰來料：皇蘇（讓球主勝）

今季加盟日之泉JC晨曦的港腳張健峰，擅打左中場及左後衞多個位置，除了罰球有一手，最拿手係推介歐洲足球。