烏甸蓄銳碌爆「卡」

猪拉多纳

周日意甲賽事烏甸尼斯主場對佩斯卡拉，係Ali精選出擊場次，烏甸尼斯今季開得曳，目前排名竟然仲低過孱弱嘅佩斯卡拉，實在好難令人接受，不過Ali深信烏甸今場具備足夠條件變身，贏面高唱入雲，1.46倍主Ｗ係最佳過關變倍器，單頭仲可以捧埋2.35倍「讓球主勝」。

（周日晚9時開賽）

兩班波級數根本有一段好遠距離，烏甸尼斯今季踢咗7場聯賽僅1勝，除咗因為季初未在狀態外，受傷兵問題困擾同埋會方重視歐霸盃，令佢哋成為疲兵亦係主因，不過喺具經驗兼有料教頭古度連調整下，球隊近期狀態已經逐步回勇，上輪聯賽作客面對爭霸分子拿玻里僅輸一比二，但計演出甚至蓋過對手，輸得相當唔抵，基於佢哋月初歐霸盃分組賽作客反勝勁敵利物浦，出線形勢非常樂觀，周中歐霸只係對瑞士嘅弱旅年青人，已經唔再需要輪換留力，可以全力應付今仗。事實上經過兩周國際賽休戰期，呢支疲兵得到足夠休養生息，Ali相信佢哋今場會有大幅進步演出，主場迎戰弱旅有足夠信心取得今季第二場意甲勝仗。
佩斯卡拉實力見底

Ali講咗好耐，佩斯卡拉無論計兵源同球員質素，今季都注定要護級，我甚至相信佢哋到季尾好難護級成功，佢哋之前連仗處於劣勢下得分，運氣係主要因素，上輪主場慘吞拉素3蛋，演出仲係災難性咁差，實力確已見底，今仗雖然有守將辛安同中場主力華迪美韋斯停賽期滿復出，不過主力後衞烏路斯哥錫同中場基斯比哥路斯因傷缺陣，人腳依然不整，作客面對烏甸擺明唔夠砌，除非今仗演出突然大幅進步，否則預期唔只輸一粒！
Ali 推介：

烏甸尼斯讓球勝 ★★★★

費倫天拿上盤 ★★★

國際米蘭大 ★★★