曼聯留力歐聯僅熟唔奇

猪拉多纳

球員都係人，12日內打4場波都咪話唔甘，當「紅魔鬼」遇上魔鬼賽程，單係今晚面對硬淨到不得了嘅史篤城唔易食啦！曼聯下周中要踢歐聯，今仗喺奧脫福出擊極可能收起部分主力，橫睇掂睇都炒唔起史篤城，寧博3.7倍「讓和」。（有線200及300、廣東體育周六晚10:00直播）

曼聯嚟緊周中會喺歐聯鬥布拉加，之後就會喺英超同英聯盃兩鬥車路士，咪忘記幾位國腳好似朗尼、卡域克、湯卡華利、香川真司同尹佩斯等等都啱啱喺世盃外圍賽搏殺完，你估佢哋係鐵人咩？兩大守將尼曼查維迪同菲爾鍾斯續抖，好在翼鋒艾舒利楊格同後衞基斯史摩寧都齊齊傷愈，多咗人調配嘅領隊費格遜預計會執一執個陣，留力應付布拉加。
史篤城聯賽7戰僅1敗

對家史篤城出名係曼聯嘅「私房菜」，近4次造訪奧脫福輸晒不特止仲勁失13球，擺明畀「紅魔鬼」食住。之不過咁，史篤城新季表現穩打穩紮，開季7場聯賽僅輸1仗，最近作客利物浦唔使輸，之前造訪車仔亦只係僅輸1粒，照計面對有歐聯後顧嘅曼聯唔會輸得太肉酸。