保亞斯拆車報仇

猪拉多纳

今晚英超「超級倫敦打吡」，4連勝嘅熱刺喺主場迎戰車路士！呢場波嘅焦點係熱刺領隊保亞斯，呢位少帥上年揸車半季被炒，今鋪肯定諗計報仇，加上熱刺有加里夫巴利壓陣，平手盤捧主隊啦！（有線200、204（3D）及300周六晚7:45直播）

呢場波咁矚目，我哋有線當然會安排高清204以3D直播啦，正呀！講番保亞斯，呢位早幾日先度過35歲牛一嘅葡國型男，上季慘被車仔請食無情雞，對贏盡錦標嘅佢嚟講，都算係教練生涯最大恥辱咯。其實佢曾經埋怨阿布冇畀時間佢執好隊波，呢啖氣到依家都仲頂住，難得熱刺咁有耐性，即使開季表現麻麻，但班主依然對保帥投以信心一票，保亞斯上月開始亦終於撥亂反正，帶領熱刺踢出英超4連勝，氣勢如虹，勁呀！
保帥倒戈摸清車仔底細

講真，論領軍功力同經驗，保亞斯都比現任車仔領隊、曾經係佢助手嘅迪馬堤奧勝一籌，而且依家隊車仔條中場線雖然面目全非，但前鋒費托、一眾守將都跟過保帥搵食，佢哋有幾多料、有咩弱點，保亞斯又點會唔知吖？

論人腳，熱刺亦唔輸蝕畀車仔o架！前鋒迪科爾、中場丹普西同王牌加里夫巴利都弗到漏，尤其係巴利，呢位威爾斯球星多次「單天保至尊」，係，小弟都覺得佢成日插水，好乞人憎，但不得不承認佢嘅力量、速度同射術都係世界級，車仔條防線真係未必頂得住佢。
泰利認罪今仗開始停4場

車路士依家係就係坐住個一哥位，不過佢哋嘅作客表現真係唔算好好，好似上月底另一場「倫敦打吡」咁，「藍戰士」全場畀阿仙奴圍攻，最終搶走3分只係靠運，再數多場「倫敦打吡」，佢哋作客昆士柏流浪亦只係執到1分，加上中堅泰利尋日喺種族歧視案認罪，今場開始停賽4場，今晚面對氣勢正值巔峰嘅熱刺，輸波絕對唔奇！

頂占筍盤：熱刺（平手盤）
藍戰士作客對賽少開W

‧車路士近6次作客白鹿徑球場只取得1勝。

‧熱刺9月至今喺各項賽事未輸過。

‧車路士最近連續4場開大。