FIFA病毒搞到皇馬頭都大

猪拉多纳

飽受「FIFA病毒」困擾嘅皇家馬德里，陣中多名球員踢完國際賽後帶傷歸隊，後防更加係重災區，今晚主場對切爾達，隨時漏洞百出，好彩阿根廷箭頭希古恩嘅傷勢唔重，今晚可聯同大勇嘅C朗喺前線喪攻，大盤可期，就算中位數調至3.5球都冇有怕。（now 632周日凌晨零時直播）
鬥切爾達防線不整

經過近兩周為國服役後，相信皇馬係「FIFA病毒」嘅最大受害者，馬些路、法比奧干查奧、艾比路亞先後受傷，其中前者要抖成三個月；咁蹺三人受傷後，該隊冇一名正宗左閘可用，有傳年輕球員拿祖要頂硬上填補左路空缺，缺態的艾辛要客串右閘，面對切爾達快速型中前場如阿斯柏斯、高恩迪利、伊亞高艾斯巴斯等，兩肋缺口表露無遺，加上基迪拉仍未復操，主帥莫連奴被迫用莫迪歷串演防中，似乎唔夠硬淨喎。

雖然皇馬兩大箭頭賓施馬同希古恩亦有傷在身，幸好後者傷勢較輕，預計可趕及披甲，配埋近六仗狂轟十粒嘅C朗，進攻火力有保證，由於「落後榜首巴塞同馬體會八分，搶分衞冕一於以攻代守豁出去，面對反擊銳利嘅切爾達，大盤咪走雞。
拉科巴塞都捧大盤

至於死敵巴塞隆拿，今晚則要作客拉科魯尼亞，陣中王牌美斯由於要陪女友開刀生仔，據報已經同球會請咗假，今仗唔使預佢，不過該隊前線仍有韋拿、柏度洛迪古斯、基斯甸泰路可用，而拉科主場有一定戰鬥力，唔會死守坐以待斃，難得大細中位數維持2.5球，入球大有買趁早。

（now 632周日凌晨4時直播）