曼城歐聯後顧難拉布

猪拉多纳

英超西布朗今晚主場鬥聯賽冠軍曼城，今季西布朗表現令人眼前一亮，能夠與熱刺及愛華頓同分排行前列，相信好多球迷都未必估到。依家西布朗球員可謂信心爆棚，加埋有主場之利，度士深信西布朗可以畀到曼城一定壓力。今場曼城作客讓半一，下盤值得留意。

（有線201及301台周六晚10時直播）
西布朗主場聲大夾惡

西布朗今季聯賽4次主場全勝，所擊敗嘅對手包括利物浦及愛華頓。而度士曾經到過英國睇波，見識過當地主場球迷有幾大威力。全場幾萬人向住你「開汽水」，如此浩大聲勢唔係個個都頂得順。尤其今季西布朗成績咁好，球迷肯定嗌得更加落力，對於曼城必有影響。其實曼城有唔少球員要出戰國際賽，身體狀態未必可於短時間之內回復正常。另外曼城下周中要出戰歐聯對荷甲阿積士，今場聯賽對西布朗未必去得太盡。實在曼城今場有疑點，讓波唔多抵玩，下盤可留意。