賀芬咸猛火屠「夫」

猪拉多纳

國際賽後又到各地聯賽回歸，德甲今晚獨腳戲由賀芬咸喺主場迎戰新升班嘅格雷特霍夫。主隊喺日本新星宇佐美貴史爆發下，表現逐漸改善，要贏幾近「零火力」嘅格雷特霍夫易如反掌，1.77倍主勝冇走雞啦！

（有線64及204周六凌晨2:30直播）

賀芬咸目前以7戰得7分排喺德甲第13位，僅較護級安全線多2分，7戰失14球更係全德甲防守最差球隊。不過睇見咁就以為佢哋冇料到，力奇會覺得大家武斷咗多少。查實賀芬咸經歷開季3連敗後，之後3場係取得2勝1和成績，狀態明顯回升，直到國際賽前先以0:2不敵拜仁，輸畀班霸絕對係非戰之罪。
賀芬咸門神韋爾斯回歸

再者，陣內幾名新兵都開始融入大軍，整體戰鬥力自然會有改善，最明顯係由拜仁外借嘅宇佐美貴史，至今已經交出2個入波同2次助攻，佢嘅突破能力同埋門功架都令人眼前一亮。此外，喺皇馬出身嘅祖斯盧亦開始展現實力，成功由瑞士射手戴迪約克手中搶走單箭頭位置，球隊火力提升指日可待。

搞掂進攻，防守同樣令人憧憬！賀芬咸開季頭4仗失咗11球，但近4場只失3球，防線開始建立信心，對住格雷特霍夫有乜好驚。仲有，前德國門神韋爾斯喺因傷休戰4場後，今晚會復出，頭3場佢孭晒大鑊，今晚都係時候打番場爭氣波啦！
格雷唔識入波

格雷特霍夫呢邊，新升班7戰得4分排包尾。呢班波最大毛病係幾乎「零火力」，自從今夏放走升班功臣、上季德乙神射手奧斯恩後，前線只靠老將艾沙姆支撐，至今7戰僅入2球係德甲最差。最慘係呢2個入波一個係反彈入球，另一個係烏龍波，難聽啲講佢哋仲未試過堂堂正正射破對手大門，今晚3分睇怕都係賀芬咸袋袋平安。

猪拉多纳