巴西打徒弟熱W冇走雞

猪拉多纳

徒弟打師傅仲有得偷雞？好難咯！日本今日响波蘭弗羅茨瓦夫中立場，同巴西大軍拍跳，雖則唔會學似中國隊咁樣慘敗，但係都好難繼贏法國之後再次爆冷，巴西個1.4倍W冇走雞。

（開賽時間：周二晚8:10）

由J聯賽元年開始，就刻意模仿森巴足球嘅日本，近年終於打出頭，成為亞洲一哥，佢哋近8場男足國際賽更加未輸過，6勝2和嘅戰績，靚過唔少世界一流勁旅，上場波仲响巴黎砌低法國添，今仗難免令人對佢哋有憧憬。不過，長友佑都同對法國一戰小腿負傷缺陣嘅本田圭佑，都坦承上場波日本其實踢得麻麻，贏係贏在法國打得仲曳，射門次數20對7佔盡優勢都輸波，長谷部誠直情話：「對法國10次至贏到1次，證明我哋同人哋差距仲好大！」
馬些路骨折抖3周

由此可見，日本仲未達到世界一級水準，本田圭佑今場就算復出，都未必搞得掂「師傅」，何況巴西唔只往績佔盡上風，近5場國際賽全勝，入20球只失1球，卡卡又重現昔日風采，只要唔係太Hea，贏波絕對冇問題。

當然，巴西今場有3件後衞打柴，除咗丹尼爾同波圖個阿歷士辛度，尋日件皇馬左閘馬些路練波嗰陣右腳骨折，至少要抖3個月，令到森巴大軍要重新執過條防線，可能會畀日本偷雞入到波都未定。但佢哋今次遠赴波蘭踢友賽，目的就係宣傳2014世盃決賽周，吸引多啲東歐客去巴西使錢，又點肯輸畀日本仔吖？