波蘭靠激情惡鬥三獅兵

猪拉多纳

唔經唔覺，歐國盃落幕到依家已經成4個月，但係東道主之一嘅波蘭球迷，家陣仲沉醉喺4個月前嘅激情當中，今晚波蘭喺主場對英格蘭，有呢班咁投入嘅球迷打氣，加上波蘭球員質素唔曳，絕對有力搞到「三獅軍」敗興而歸。
英格蘭換6個正選

歐國盃期間，「感覺就似喺屋企」呢個標語，喺波蘭周街都見到，當波蘭喺分組賽同捷克踢完告別戰，兩萬幾名球迷同時起立，用掌聲同歌聲送別一眾國腳，場面令人感動。事實上，波蘭行軍快速，靠體力擾亂對手節奏，只可惜呢班波始終唔夠經驗同冇運，冇辦法喺歐國盃更進一步，相信經過呢次大賽磨練，年輕化嘅波蘭將會成為歐洲主流勢力。

英格蘭上場波以5:0大炒聖馬力諾，但對手只係由業餘球員組成嘅雜牌軍，酒吧老闆、電力技術人員、教師乜都有，靠踢波每周平均搵近百萬嘅「三獅兵」贏得5粒，根本令人難以信服。何況英格蘭今戰又有6個正選位置調整，右閘格連莊臣同謝拉特刑滿復出，前鋒迪科爾、翼鋒占士米拿、守將艾殊利高爾同尼史葛都會回歸正選，霎時間變動咁大未必係好事，今晚面對死纏難打嘅波蘭，戰情隨時陷入膠着狀態。