師徒對決 巴西難攞日本甜頭

猪拉多纳

國際賽日有場矚目熱身賽，巴西同日本於波蘭拍跳，眾所周知，日本足球師承巴西，隨住近年球員外流潮，日軍水平火速冒升，上場鬥法國由曼聯球星香川真司一箭定江山，食住個勢，今次對住「師傳」巴西有力再製造冷門賽果，博「讓球客勝」！

（周二晚8時10分開賽）
東瀛大軍愈戰愈勇

日本推崇巴西足球，鍾意利用短傳小組入滲，曾被稱為「亞洲巴西」，意國教頭沙哲朗尼為球隊注入新元素，現時大軍攻守取得平衡，進攻踢來控住個波慢慢搓，有多少似西班牙，後面防守機動硬淨，甚具意大利影子。現時隊內多外流球員，於高水平賽事浸淫多時，級數提升唔少，其中以曼聯進攻中場香川真司最醒，上次對法國於快速反擊射入奠勝球，乘勇挑戰巴西，絕非冇得揮！

一睇巴西名單就梗係星光熠熠啦，中場有兩代球星奧斯卡杜斯山度士同卡卡組成「雙核」，前面有侯克同尼馬等猛人，換轉係以前隊日本，未踢已經腳軟。不過，日軍守將長友佑都及吉田麻也等出晒國搵食，已非吳下阿蒙，香川真司賽前仲叫隊友踢得更放，唔怕冒險同對手砌過，相比起班巴西球星，日本球員更想於世界大舞台證明自己，今次將以壓逼踢法務求令對手出錯，隨時盲拳打死老師傳，受讓值博！