英軍傷兵多讓波有難度

猪拉多纳

今晚於華沙爆發「雙蘭大戰」！「三獅兵團」英格蘭與外圍賽老對手波蘭狹路相逢，前者傷兵滿營，今仗雖有隊長謝拉特刑滿復出，但作客要贏「波」絕非易事，加上波蘭以往於自己地頭對英軍表現唔曳，有得受讓咁筍，「讓球主勝」捧得過。

（周三凌晨3時開賽）

呢排英格蘭處於多事之秋，先有泰利因不忿歧視案遭英足總針對而退出國家隊，「死對頭」里奧費迪南又被領隊鶴臣冷待，剛戰聖馬力諾大勝而回，但翼鋒禾確特於此役畀人撞到嘔血要抖兩周，連埋林柏特同賴恩貝特蘭全部因傷缺陣，三人都冇隨隊遠征華沙，雖有隊長謝拉特同格連莊臣停賽完畢可復出，但傷兵滿營下，對鶴帥臨場調動必有影響。而波蘭絕非聖馬力諾同摩爾多瓦之流，其防線固若金湯，英軍要攻破對手並非易事。
波蘭羅拔仔大熟大勇

另一邊廂，波蘭亦有隊長巴拉斯塞高斯基受傷未能披甲，但多蒙特雙星羅拔利雲度夫斯基及比薛斯基狀態唔曳，其中羅拔仔表現漸趨成熟，於單箭頭位置上，唔單止有身形、有士哥，為後上隊友鋪橋搭路亦有一手，令波軍的反擊變得更銳利。翻查紀錄，波蘭經常於大賽外圍賽同英軍相遇，尤其於自己地頭出戰分外醒神，總會令三獅兵團吃盡苦頭，近六次波軍在主場有四次同對手打和，表現硬淨，今仗有力於英軍身上搶分，主場有得受讓超筍，「讓球主勝」值得捧場。