迪比亞路希斯基大駁火

猪拉多纳

今日澳職上演「星球大戰」，FC悉尼主場對紐卡素噴射機，皆因迪比亞路同希斯基將會正面交鋒。兩位球星同病相憐，登陸澳職落筆打三更，首仗即輸波，令球迷大失所望。不過亦刺激兩人未來賽事更落力，挽回面子，尤其係今仗狹路相逢萬眾矚目，必然被傳媒及球迷攞嚟比較，大家都唔衰得，勢必鬥射術爭取入波，Mic少捧入球大。（有線64及204台周六下午2時30分直播）

FC悉尼以破澳洲球類薪酬紀錄嘅200萬美元年薪，成功簽下迪比亞路，提升球隊實力及知名度，希望做到名利雙收。迪比亞路可謂身負重任，尤其係首仗作客0比2不敵威靈頓鳳凰後，佢難免會感到壓力，今仗返回主場，更加渴望帶領球隊打開勝利之門，以證身價！以呢位意大利名將超班級數，只要發揮正常水準，應該好大機會入到波。而且迪比亞路策劃進攻方面亦有一手，就算自己入唔到，亦可為隊友創造入波機會。
客軍組全英鋒線

另一邊廂，紐卡素噴射機嘅希斯基好適合踢澳職，皆因澳洲語言及文化上同英國非常相似，甚至足球風格亦充滿英式風味，啱晒呢位高大中鋒發揮。呢位前利物浦球員處境同迪比亞路接近，身為隊中首席球星，上陣一定加多幾錢肉緊，向球會及球迷交代。噴射機仲有另一位英格蘭前鋒布歷捷斯，同希斯基同聲同氣，相信兩人好快可以建立默契，擦出火花，有力撕破對手防線。

事實上，兩軍近年對壘經常上演入球騷，FC悉尼上季主場對噴射機，雙方合力炮製七個入球，依家有埋雙星壓陣，入波唔會少。
意國老金童最緊要Enjoy

澳職愈來愈多球星，曾經贏得○六年世界盃冠軍嘅迪比亞路，今日已成為FC悉尼球員。呢位前祖雲達斯金童承認，除利物浦搵過佢之外，亦曾經收過來自美國、巴西、西班牙、卡塔爾、日本、中國及泰國球隊誠意邀請，而且所提出嘅薪酬亦相當之高。不過迪比亞路坦言金錢並非主要考慮因素，最重要係佢可以從比賽當中尋回足球樂趣。

對於最終選擇効力FC悉尼，原來迪比亞路考慮好多方面，包括佢好少提及嘅家庭：「好多人都話迪比亞路應該好好享受人生，但我覺得踢足球已經一種享受，冇其他運動可以畀到我呢種感覺。其次就係家庭，悉尼係全世界其中一個安全及舒適嘅城市，我同太太及兒子都可從生活上學到好多新鮮事，包括語言。」另外，迪比亞路再一次重申拒絕利物浦與希素慘劇有關，不想令雙方球迷反感。