樸茅靠變形金剛打殘乙組仔

猪拉多纳

「變形金剛」拯救樸茨茅夫！今季淪落英甲角逐嘅樸茅早排仲死氣沉沉，點知司職中堅嘅佳比斯最近突然變身射手，連續3場聯賽入波，呢位「變形金剛」仲自爆初出道嗰陣係打中鋒，而且試過20場聯賽喪入18球，腳風咁順話唔埋今晚又嚟料，今晚喺英錦次圈對住低一個Level嘅韋甘比可以秤先，一於捧2.8倍「讓主」！（開賽時間：周三凌晨2:45）
韋甘比傷兵問題嚴重

無疑受到托管嘅樸茅基於財赤，只能以1個月短約形式簽入自由身球員，不過領隊艾伯頓都執到唔少筍嘢，包括匈牙利左翼布斯沙基同斯洛伐克中堅米查歷克，呢班「臨時工」表現對辦，難怪隊波戰績冒升！

對家韋甘比新季喺英乙10戰只係贏得兩場，戰績咁曳主要係傷兵問題嚴重，正、副選門將貝爾同恩格咸都養緊傷，中場森活特同前鋒奧利亦打咗柴，越級挑戰樸茅輸鑊勁唔出奇。
英錦賽制：

今輪為第2圈，以一場過分勝負，若法定時間內打成平手，隨即互射12碼決勝。