紅軍齋攻 防線好大鑊

猪拉多纳

英超利物浦主場鬥史篤城，紅軍今季聯賽表現一塌糊塗，開季到依家主場仲未開齋，周中歐霸盃更慘遭滑鐵盧，領隊羅渣士實在難辭其咎。為平息球迷嘅怨氣，今晚返到主場實行同史篤城搞場「大」龍鳳，1.85倍入球大值博。（有線201及301周日晚10:00直播）
史篤城作客識入波

紅軍周中主場先勝後敗，相信球迷們一定唔會收貨。好在利物浦條鋒線素來有保證，近5戰總共入咗15球，3位前鋒蘇亞雷斯、蘇索同史達寧「士哥」停不了，當中最弗嘅梗係「哨牙蘇」啦！呢位烏拉圭殺手近2場轟入4球，腳風順到冇人有。

只可惜利記前鋒點勁都冇用，事關佢哋條防線實在太水皮喇，近5戰竟然勁失11球，連拿、史卡迪爾、艾格同馬田基利輪流犯錯，搞到前面入埋唔夠後面輸，今仗雖然主場出擊，要入波唔難，但係要保持清白身就好難嘞！

對家史篤城開季3場作客錄得2和1負，戰績雖然麻麻，不過班鋒將都算交到貨，平均每場都入到1球，今晚佢哋作客利物浦，小妹相信史篤城唔會坐以待斃，兩隊一定互攻，與其博利記反彈，倒不如敲入球大好過。
以老竇為榜樣！

工作最大嘅動力，就係嚟自我嘅屋企人！當每朝鬧鐘響想賴床嗰陣，我就會提醒自己：爸爸日夜顛倒工作咁辛苦，但一樣咁勤力，自己咁後生又點可以咁易嗌辛苦呢！當工作唔如意嗰陣，我又會提醒自己唔辛苦點得世間財呢！我要努力搵錢， 屋企人食好住好我就開心喇！